Jabuuti,(insidesomalia.org)-Dowladda KMG ah ee Soomaaliya iyo Isbaheysiga ayaa guddiyo ay iska soo dhex doorteen Ergadii ka kala socday labada dhinac oo labadii maalmood ee la soo dhaafay shir ugu socday Magaalada Jabuuti ayaa shalay gelinkii dambe waxay wada saxiixdeen qodobo ka mid ah heshiiskii ay labada dhinac horay u gaareen iyo sidii loo dardar gelin lahaa qodobo ay isla gaareen shalay, waxaana Dowladda u saxiixay heshiiska Axmed Cabdisalaan Wasiirka Warfaafinta iyo Cabdi Raxmaan Cabdi Shakuur, iyadoo Guddiyada farsamo ee labada dhinacna ay u kala saxiixeen Maxamed Maxamuud Xeyd iyo Cumar Xaashi Aadan.

Guddiyadan ayaa waxay ka shaqeyn doonaan waxyaabihii ku qornaa heshiiskii ay Dowladda  iyo Isbaheysiga Mucaaradka horay ugu gaareen Dalka Jabuuti, sidoo kale waxay ka shaqeyn doonaan arrimaha Siyaasadda iyo Ammaanka, iyagoo ka howlgeli doona dalka Soomaaliya gudahiisa iyo dibaddiisa, waxaana ay si wada jir ah isaga kaashanayaan mira dhalinta qodobada heshiiska.

Waxaa ka mid ah qodobada ay labada dhinac ku wada heshiiyeen in la sii wado wada hadallada ay labada dhinac gaareen, isla markaana laga hor-tago wax kasta oo wiiqi kara heshiiska.

In la soo dhaweeyo dadaallada nabadeed ee xal doonka ah ee ay wadaan Beesha Caalamka iyo weliba muwaadiniin Soomaaliyeed ee ku kala sugan dalka gudahiisa iyo dibaddiisa.

In la cambaareeyo dilalka loo geysanayo dadka rayidka iyo Kooxaha Burcad Badeedka ah.

In ay dhinacyada heshiiska gaaray ay si weyn uga walaacsan yihiin xaaladaha bani’aadannimo ee ka taagan Soomaaliya, beesha caalamkana ugu baaqay in gargaar deg deg ah lala gaaro dadka ku dhibaateysan gudaha dalka Soomaaliya.

In Qaramada Midoobay ay dedejiso Ciidamada Nabad-ilaalinta ah ee ay u soo direyso Soomaaliya, si Ciidamada Itoobiya uga baxaan Soomaaliya, shacabka Soomaaliyeedna ugu laab-qaboojiyay in ay ka dhabeynayaan dadaalka ay ugu jiraan sidii shacabka Soomaaliyeed u heli lahaayeen Nabad, Xasilooni, Midnimo, Madax-bannaani iyo sharaf.

Goobta lagu saxiixday heshiiskan ayaa waxaa goob joog ka ahaa Wakiilka Guud ee Qaramada Midoobay u qaabilsan Soomaaliya Ahmadou Ould Abdallah, Safiiradda Mareykanka, Faransiiska, Ingiriiska, Midowga Yurub, Jaamacada Carabta, Midowga Africa iyo wakiio kale oo ka socday beesha caalamka.

Dowladda KMG iyo Mcaaradka ayaa mahad celin balaaran u jeediyeen Dowladda iyo Shacabka reer Jabuuti oo ay ku tilmaameen dad walaalo ah oo ka dhiidhiyey dhibaatada heysata walaalahooda Soomaaliyeed, sidoo kalena waxay u mahad celiyeen Ahmadou Ould Abdallah iyo Wakiillada Beesha Caalamka ee u istaagay in shirkan uu mira dhalo.